E ardhmja e Antonio Conte është në fije të perit. Shkarkimi i tij nga Chelsea duket thjesht një formalitet dhe zyrtarizimi mund të vijë në orët e ardhshme. Problemi i vetëm që ka mbetur është vetëm prishja e kontratës…
Conte dhe Chelsea janë të lidhur nga një klauzolë e dyfishtë që vlen si për klubin londinez ashtu edhe për trajnerin italian, kësisoj palët po diskutojnë. Chelsea dëshiron ta largojë, ndërsa Conte nuk ka ndërmend të heq dorë nga viti i fundit të kontratës.
Ish-trajneri i Italisë nuk ka hyrë kurrë në zemrën e pronarit Roman Abramovich, edhe pse Conte ka fituar Premier League në sezonin e kaluar dhe FA Cup në këtë sezon, ku pas finales së fituar ndaj Manchester United, Antonio tha se ishte një fitues i lindur.
Shtypi anglez ka shkruar se Abramovich ka vendosur largimin e Conte dhe njerëzit e tij kanë gjetur marrëveshjes me pasardhësin Luis Enrique, mbetet vetëm për t’u prishur kontrata me Conte. Emrat e tjerë që mund të punojnë në “Stamford Bridge” janë Slavisa Jokanovic i Fulham dhe Jody Morris, trajneri i Chelsea U-19.