Shqipëria e ka humbur takimin ndaj Kosovës me rezultatin 0-3, duke marrë leksione futbolli nga grupi i lojtarëve të Shaland.
Shkëlqim Muça i ftuar në emisionin “Rubrika Sportive” që transmetohet në “RTSH”, është shprehur se është i zhgënjyer nga loja e Shqipërisë, duke theksuar faktin se nuk mban mend asgjë nga ajo që futbollistët e Kombëtares krijuan në ato 90 minuta loje.
“Luajtëm kundrejt një ekipi të organizuar dhe me shumë dëshirë. Nga fillimi i lojës deri në fund nuk mbajta mend asgjë nga Shqipëria dhe trajneri duhet të jetë konfuz për lojtarët që luajtën në fushën e lojës.
Megjithatë unë mendoj se Panuçi është i paqartë me projektin që ai do të zgjedh për eleminatoret e ardhshme. Me ndërrimet e trajnerit italian, loja shkoi akoma edhe më keq. Ndoshta në rastin e largimit të Roshit dhe Qakës, Panuçi mund të priste edhe disa minuta, për të folur në dhomat e zhveshjes”, ka thënë Muça.