Partizani ka luajtur 6 ndeshje këtë sezon në Superiore dhe numëron 11 pikë. Në këto gjashtë sfida, “demat e kuq” kanë pësuar vetëm 2 gola, duke shënuar plot 10.
Sulmi duket në formë të mirë, por edhe më solide duket prapavija. Mbrojtja e të kuqve, edhe pse me pak alternativa, ka treguar se është një mur i pakalueshëm. Dy golat e pësuar Partizani i ka marrë që në javën e parë, në humbjen 2-1 kundër Kastriotit. Në pesë sfidat pasardhës në Superiore, “demat” nuk janë ndëshkuar asnjëherë.
Një ecuri fantastike, por në sezonin e titullit kampionat 2018-’19, djemtë e Skënder Gegës arritën plot 7 ndeshje radhazi pa pësuar gol. Një ecuri që nisi më 25 gusht të vitit 2018, në fitoren 2-0 kundër Kamzës, dhe që përfundoi kundër Luftëtarit më 21 tetor 2018, ku sërish fituan me rezultatin 2-1, por nuk arritën ta mbanin rrjetën e paprekur.
Partizani i Ilir Dajës mund ta barazojë këtë rekord të dy sezoneve më parë, nëse nuk pësojnë gol në sfidat kundër Teutës dhe Vllaznisë.
