Fitorja 3-2 që Shqipëria arriti dje në mbrëmje ndaj Austrisë në ndeshjen e pestë të Grupit B në Ligën e Europës ka qenë një hakmarrje për kombëtaren e femrave në volejboll, që jo vetëm ka konsoliduar vendin e dytë por dhe konfirmuar kualifikimin për në fazën finale të Divizionit të Argjendtë. Mbi të gjitha, një fitore me përmbysje e vajzave kuqezi, që ishin në disavantazh 0-2 me sete, por në fund arritën të triumfojnë ndaj kryesueseve të grupit.
Kapitenia e kombëtares kuqezi Ariola Prenga, pas ndeshjes tha: “Jam shumë e lumtur për këtë fitore, të gjitha vajzat janë. E dinim që do të ishte një ndeshje e vështirë, pasi Austria ka një ekip të fortë dhe këtë gjë e tregoi edhe në Tiranë. Por pas humbjes në ndeshjen e parë, për ne ishte shumë e rëndësishme fitorja në përballjen e kthimit dhe ia dolëm mbanë. Dua të falënderoj skuadrën dhe stafin për këtë sukses, që na jep më shumë besim për të ardhmen”.