Sulmuesi i kombëtares franceze Olivier Giroud ka pësuar një dëmtim të frikshëm në ndeshjen miqësore që “gjelat” zhvilluan të shtunën në mbrëmje ndaj Amerikës (ndeshja u mbyll në barazim 1-1). Në minutën e 55-të, sulmuesi i Chelsea në Premier League, u përplas “kokë më kokë” me mbrojtësin e Amerikës, Matt Miazga dhe të dy përfunduan të shtrirë në fushë. Një “lumë gjaku” në fushën e blertë krijoi mjaft panik te lojtarët dhe ai që e pësoi më keq ishte sulmuesi i Francës, që u detyrua të fashonte kokën.
Të dy lojtarët dolën nga fusha me këmbët e tyre, por pas pak çastesh të dy u zëvendësuan nga trajnerët, për të evituar ndonjë traumë më të rëndë. Vendin e Giroud në fushë e zuri Ousmane Dembele, por trajneri i Francës, Didier Deschamps pret të marrë sot një lajm më të mirë nga mjekët në lidhje me gjendjen e sulmuesit, që konsiderohet i rëndësishëm për botërorin “Rusi 2018”. Sulmuesi u dërgua në spital për disa analiza, por sot do të mësohet më shumë për gjendjen e tij.
https://youtu.be/uCsvBz8TSKk
