Realdo Fili ka përfunduar në axhendën e klubit të Livornos. Skuadra e sapongjitur në Serinë B ka marrë informacionet e duhura rreth lojtarit 22-vjeçar, i cili këtë edicion u aktivizua në dy skuadra. Mesfushori nga Fieri është pëlqyer nga menaxherët e Livornos, të cilët janë interesuar për Filin duke shprehur gatishmërinë që ta kenë në gjirin e tyre për edicionin e ardhshëm.
Madje drejtuesit e klubit tërhiqen edhe nga fakti që lojtari është i lirë nga çdo detyrim kontraktual, pasi lidhja e tij me Kamzën përfundoi me mbylljen e edicionit. Ish-futbollisti i Apolonisë u aktivizua në 6 ndeshje me Partizanin deri në muajin dhjetor, duke nisur 2 prej tyre si titullar, për një total prej 225 minutash. Kalimi te Kamza në muajin janar e pa atë si protagonist, ku në 17 ndeshje u aktivizua në 1096 minuta, duke shënuar dhe dy gola, tejet të rëndësishëm në arritjen e objektivave për të shpëtuar në fund nga rënia.
Gjithashtu Fili është aktivizuar edhe për dy ndeshje me Kombëtaren Shpresa, duke u konsideruar si një nga talentet e futbollit shqiptar. Por kalimi te Partizani, sidomos ardhja e Mark Iulianos nuk rezultoi diçka e mirë për të. Megjithatë, rilindja te Kamza ka rikthyer vëmendjen drejt tij dhe shumë shpejt mund ta shohim në Serinë B, me klubin e njohur të Livornos.