Rekordi i botës në garën e 100 metrave është ai i vendosur nga Usain Bolt, 9”58, ndërkohë që koha më e mirë e këtij viti në këtë disiplinë është 9”91. Ajo u vendos sot nga atleti 22-vjeçar britanik Zharnel Hughes, gjatë një turne të zhvilluar në Xhamajkë, pikërisht në shtëpinë e sprinterit rekordmen bote.
Ajo që bie në sy dhe që ka lëshuar alarmin është se prej dy vitesh kohët nën 10 sekonda të dhëna nga atletët janë të pakta dhe jo vetëm kaq, por ato kohë janë shumë larg rekordit të Bolt. Edhe pse u përfol për disa emra si pasardhësit e mundshëm të sprinterit xhamajkan, duket se asnjëri nuk është i denjë të marrë këtë trashëgimi.
Kohët e dhëna nga atletë të ndryshëm kanë qenë më së shumti sporadike dhe nuk kanë patur vijueshmëri, çka e bën rekordin e Usain Bolt të paarritshëm, të paktën për momentin, pasi nuk duket ndonjë atlet në gjendje që t’i afrohet kësaj kohe. Një alarm, që tregon se mungojnë sprinterët e dikurshëm, të aftë që të vendosin rekorde.
