Antoine Griezmann do të ndihmonte në përmirësimin e Barcelonës, sipas Ousmane Dembele, i cili e cilësoi transferimin e bashkëlojtarit te Franca si “diçka të jashtëzakonshme”. Ylli i Atletico Madridit ka qenë i lidhur ngushtë me kalimin te kampionët e La Liga-s në këmbim të pagimit të klauzolës prej 100 milionë eurosh.
27-vjeçari francez, i cili e ndihmoi Atletico Madrid që të fitonte “Europa League” këtë sezon, zbuloi se do ta vendosë të ardhmen e tij para Kupës Botërore në Rusi. Mesfushori i Barcelonës, Dembele, tha se është i ngazëllyer nga ardhja e mundshme e Griezmann në “Camp Nou”.
“Ne nuk kemi folur shumë për këtë transferim të Antoine, – tha Dembele. – Nëse ai vjen te Barça, do të ishte diçka e jashtëzakonshme. Po flasim për një lojtar të madh, një sulmues të madh. Mendoj se ai do të na ndihmojë të jemi më të mirë”.
Griezmann është duke u përgatitur për Kupën e Botës në Rusi, ku Franca do të takohet me Australinë, Perunë dhe Danimarkën në Grupin C. Ai shënoi 29 gola për Atletico Madrid në sezonin 2017-2018. Dembele, ndërkohë, duroi një sezon të vështirë në “Camp Nou”, pas ardhjes së tij si blerje e madhe nga Borusia Dortmund.
Duke reflektuar mbi sezonin e tij të parë me katalanasit, 21-vjeçari tha: “Një sezon i parë me shumë lëndime. Ishte një sezon i vështirë, kam pasur shumë lëndime, por kam mësuar shumë. Grupi, skuadra dhe presidenti më besojnë, do të shohim se çfarë do të ndodhë në sezonet e ardhshme. Unë kam bërë progres në aspektin taktik, por edhe në mbrojtje. Mbroj shumë më tepër te Barcelona. Unë duhet të mbroj më shumë, sepse jemi të gjithë të bashkuar”.
