Lojtari i përfaqësueses angleze Danny Rose është shprehur se vitin e kaluar ka vuajtur nga depresioni.
“Nuk është sekret që gjatë sezonit të fundit kam kaluar një moment të vështirë te Tottenham,” shprehet mbrojtësi i majtë për gazetarët anglezë.
Ai e ka pasur të vështirë të përballojë psikologjikisht problemet me gjurin. Por dëmtimit i janë shtuar edhe gjëra të tjera si vetëvrasja e xhaxhait të tij si dhe ofendimet raciste ndaj mamasë së tij.
“Jam diagnostikuar me depresion. Deri tani nuk e dinte njeri. Kishte momente që nuk doja të luaja më futboll. Nuk e mbaj mend se sa ilaçe kam pirë, se sa gjilpëra kam bërë vetëm për të qenë gati për Tottenham.”
Rose dy ditë më parë bëri bujë me deklaratat e tij, ku ka udhëzuar familjen e tij të mos udhëtojë në Rusi për shkak të racizmit të madh që ekziston. Gjithsesi ai ndihet i lumtur që është pjesë e Anglisë.
“Anglia ka qenë shpëtimi im. Nuk e di si mund t’i falënderoj mjekët dhe trajnerin.”