Shtypi ndërkombëtar vlerësoi performancën e Luka Modric kundër Argjentinës. Ato e caktojnë mesfushorin kroat si fitues të qartë në betejën e “10”, që ai kishte me Leo Messin, gjatë përplasjes direkte të Botërorit të Rusisë, ku ballkanasit fituan 3-0 ndaj amerikano-jugorëve. Madje, prestigjiozja sportive italiane, “La Gazzetta dello Sport” e konsideron kroatin e Real Madridit të denjë për “Topin e Artë”. Performanca e Rakitic, lojtar i Barcelonës, është theksuar, gjithashtu.
Daily Mail (Angli) – “Me Messin e izoluar, Modric e ka fituar betejën e numrave “10”. Messi mbeti krejtësisht në hijen e Luka Modric, numrit 10 të Kroacisë, i cili ishte në qendër të çdo gjëje që ndodhi në ndeshjen Argjentinë-Kroaci. Ai ishte motori dhe strategu i Kroacisë. Ishte një bashkim i çuditshëm i forcave mes Barcelonës dhe Real Madridit: Rakitic dhe Modric dominuan ritmin në mesfushë. Çdo herë që Kroacia doli përpara, Modric bëri spektakël me topin. Falë dirigjimit të tij, argjentinasit u rrudhën dukshëm prapa”.
La Gazzetta dello Sport (Itali) – “Modric dhe Rakitic janë mesfushorët, që vranë ëndrrat e Argjentinës, të enjten në mbrëmje. Udhëheqësi i Kroacisë ishte Luka Modric, i cili e meriton “Topin e Artë”, por ndoshta kurrë nuk ta fitojë”.
BBC (Angli) – “Pjesa e dytë ishte një shfaqje e vazhdueshme mbresëlënëse e dominuese nga Kroacia, e ndriçuar nga një moment i magjisë së numrit të vet 10, e mjeshtrit Luka Modric, që me të drejtë u shpall njeriu i ndeshjes”.
Olé (Argjentina) – “Kroacia, me mjeshtrin e lojës, Luka Modric, tregoi dhëmbët e saj ndaj Messit me shokë. Argjentina, mesa duket, nuk e konsideron gabim që të dështojë që në grupe, në Botërorin e Rusisë”.
The Guardian (Anglia) – “Luka Modric e plotësoi kryeveprën e tij për golin më të mirë të Botërorit”.
Daily Telegraph (Angli) – “Modriç dhe Rakitiç kontrolluan mesfushën dhe diktuan ritmin e lojës ndaj Argjentinës, e cila, nga ana tjetër, ishte shumë e dëshpëruar, si peshku pa ujë”.
L’Equipe (Francë) – “Luka Modric luajti një ndeshje të shkëlqyeshme në mesfushë, i shoqëruar sidomos nga Ivan Rakitiç, po ashtu i shkëlqyeshëm. Ata vallëzuan në fushë, ndaj një kombëtareje argjentinase me dobësi shqetësuese”.
Bild (Gjermani) – “Një gol ëndrrash nga ylli i Real Madridit, Luka Modriç, shënjoi fitoren kroate ndaj Argjentinës. Kroacia, kombëtarja me futbollin më të qartë deri tani në këtë Botëror”.