Lionel Mesi i “hoqi” fitoren nga duart Argjentinës në ndeshjen e parë në grupin C, teksa takimi ndaj Islandës përfundoi në shifrat 1-1. Argjentinasi gaboi nga pika e bardhë në minutën e 64-t të takimit, teksa goditja e tij u neutralizua nga portieri islandez, Halldorson.
Në fakt, statistikat e “pleshtit” për penalltitë janë të frikshme. Në 7 penalltitë e fundit me ekipin e Barcelonës, Mesi ka shënuar vetëm 3 prej tyre, ndërsa në total, nga 103 penallti që ka marrë përsipër në karrierën e tij, ka gabuar plot 24 nga to.
