Trajneri i Spanjës, Fernando Hierro, vlerësoi Cristiano Ronaldon pas “hat-trick” të yllit të Portugalisë kundër “La Roja”, por nuk do ta ndërronte atë me asnjeri në skuadrën e tij. Ronaldo bëri një performancë mahnitëse në ndeshjen e Grupit B, duke shënuar nga një goditje e shkëlqyer dënimi në minutat e fundit të lojës, për të rrëmbyer një pikë në ballafaqimin e tyre hapës të Botërorit, në barazimin emocionues 3-3 me rivalët iberikë.
Megjithëse e ka drejtimin e kombëtares në dy ditët e fundit, pas shkarkimit të Julen Lopetegui, Hierro tha se nuk do ta ndërronte asnjë nga lojtarët e tij të tanishëm me superstarin e Portugalisë. “Kur keni një lojtar si Ronaldo, je jashtëzakonisht fatlum. Kjo vlen për atë skuadër që e ka atë, – tha Hierro në konferencën e tij pas ndeshjes. – Unë kam një marrëdhënie vërtet të mirë me Ronaldon, por sigurisht nuk do ta ndryshoja atë me asnjë prej lojtarëve në skuadrën time”.