I ftuar në emisionin sportiv “Fair Play nga Enkeleida Zeko” në “News 24”, Vasil Bici, anëtar i Komitetit Ekzekutiv në FSHF, ka folur për ndarjen e parakohshme nga jeta të presidentit të FFK-së, Fadil Vokrrit.
“Fadil Vokrri ishte një futbollist i madh. Ne e ndiqnin nëpërmjet radios kur luante me Prishtinën apo Partizanin e Beogradit.
Në ish-jugosllavi ai përcaktohej si një nga më të mirët që ky vend kishte. Madje në një moment Fadili arriti marrëveshje edhe me Juventusin pasi në atë kohë ai ra në sy të italianëve.
Ky transferim natyrisht që nuk mund të kryhej pasi ashtu ishin rregullat e ish-Jugosllavisë dhe Vokrri duhet të kryente shërbimin e detyrueshëm ushtarak.”
