Një skandal i vërtetë seksual në Angli duket se tashmë ka ardhur drejt fundit. Ditën e sotme është dënuar me akuzën e abuzimit seksual me të mitur ish-trajneri i ekipit të të rinjve te Newcastle United, George Ormond.
Akuzat lidheshin me periudhën kur ai drejtonte këtë ekip në vitet ’90-të, ku mendohet se ai ka ngacmuar me dhjetëra të rinj që aspironin të bëheshin futbollistë në ekipin e njohur të Premier League. Në gjyq dëshmuan 19 prej viktimave të tij, duke thënë se ai ushtronte presion në lidhje me të ardhmen e karrierës së tyre, për të mos folur në publik për favoret seksuale që ai kërkonte nga ata.
Një rast pedofilie i përsëritur ky për 62-vjeçarin i cili ishte dënuar edhe më parë për çështje të ngjashme, ndërkohë që gjykata pritet të japë masën e dënimit në ditët në vijim.