Një ngjarje e pazakontë ka ndodhur në Argjentinë. Kalimi i ish-lojtarit të Interit, Mauro Zarate, nga Velez te Boca Juniors ka shkaktuar jehonë të madhe te tifozët e Velezit. Ata kanë çuar kërcënime në drejtim të lojtarit dhe arrijnë deri atje sa e kërcënojnë me vrasjen e fëmijëve.
Ka qenë bashkëshortja e tij që ka bërë lajmërimin për këtë kërcënim dhe madje edhe e ka denoncuar.
“Do të vrasin fëmijët e mi dhe ne. Kemi marrë kërcënime në WhatsApp, Instagram dhe Twitter, njerëzit nuk e kuptojnë se kjo është vetëm një punë. Do të më vrasin fëmijët. Shkolla e vajzës, Mia, është evakuuar për shkak të një lajmërimi për bombë. Tensioni është shumë i lartë”, ka thënë bashkëshortja e lojtarit.
Ka qenë dhe vetë lojtari që ka folur për këtë ngjarje duke thënë: “Nuk mendoja se ky transferim do të shkaktonte një zemërim kaq të madh, me kërcënime dhe fyerje deri në këtë pikë… Po, e kam kuptuar, tani duhet të pres pak që gjithçka të kalojë dhe të siguroj familjen time”, tha Zarate.
