Mesut Ozil dhe lamtumira e tij nga Kombëtarja gjermane ka bërë shumë bujë, aq më shumë me një letër të gjatë të lëshuar nga vetë futbollisti ku akuzonte këdo, madje ndihej edhe i vënë në shënjestër për racizëm. Por ky vendim nuk ka kapur të papërgatitur vetëm federatën dhe pjesëtarët e saj, por mesa duket edhe vetë trajnerin Joakim Lëv, i cili po pushon këto ditë.
Gjithsesi, në lidhje me këtë vendim që ka marrë 29-vjeçari i Arsenalit, është Harun Arslan, menaxheri i trajnerit të përfaqësueses, i cili ka dalë në kundërsulm të futbollistit. “Nëse Ozil po vuan prej të gjithë atij pluhuri që u ngrit ndaj tij, më vjen keq, por edhe Lëv u kap në befasi.
Gjithsesi, të takosh vetëm një muaj përpara Botërorit presidentin turk, nuk më duket si diçka që ka qenë e rastësishme. Prandaj, Mesut Ozil ka qenë i ftuar, por në të njëjtën kohë nuk ka dashur që të shmangë absolutisht këtë gjë, madje duke i dhuruar edhe fanellën e tij. Dhe jam i bindur kur them që nëse do ta kishte refuzuar këtë takim, nuk është se do të hynte në luftë me dikë. Nuk besoj as që Erdogani e ka detyruar me forcë që ta bënte këtë gjë.
Unë e di gjithashtu që Mesut është një person shumë i rezervuar, madje edhe tepër i sigurt në vetvete, duke qenë se edhe Gjermaninë kundrejt Turqisë nuk është se ia detyruan, por ai ishte i bindur 100 për qind për zgjedhjen e tij. Gjithsesi, në fund, edhe letra e tij nuk është se duhet marrë si akuzë direkte apo si kërcënim. Ndoshta ka qenë një shpërthim emocionesh të momentit, ndonëse për foton me Erdoganin ishte ai fajtori”
