Laçi është ndoshta ekipi shqiptar me më shumë shance për të kaluar turin në Europa League, duke parë rezultatin e ndeshjes së parë. Kurbinasit u mundën me rezultatin 2-1 në Qipro nga Anorthosis, por goli në fushën kundërshtare jep mjaft shpresa për kualifikim.
Ndeshja e kthimit do të luhet pikërisht në stadiumin e qytetit, me klubin që ka publikuar para pak çastesh edhe çmimet e biletave. Kështu tribuna qendrore do të kushtojë 1000 lekë (të reja), ndërkohë që sektori përballë dhe ai prapa portave do të kushtojë 300 lekë.
Drejtuesit kanë bërë thirrje tifozerisë për pjesëmarrje masive në këtë takim në mbështetje të ekipit të tyre, në një shans historik ndoshta për laçianët për të kaluar një tur në kupat e Europës.
