Neymar kaloi disa ditë të vështira pas eliminimit të Brazilit në çerekfinalet e Kupës së Botës kundër Belgjikës, por duket se e ka kaluar periudhën e keqe.
Në një video ai tregon ndjenjat e tij pas dështimit në Rusi dhe pranon se ndonjëherë e tepron. “Shenjat e takave në pulpë, gjunjët në shtyllën kurrizore, shkeljet në këmbë… Ju mund të mendoni se unë e teproj. E vërtetë që nganjëherë e ekzagjeroj, por është e vërtetë që unë vuaj në fushë”, thotë sulmuesi i PSG në një video që ai ka lëshuar në mediat sociale.
Neymar thotë se shumë nga sjelljet e tij vijnë nga “fëmija që ka brenda” dhe fakti që duhet të pranojë kritikat. “Ka ende një fëmijë brenda meje. Ndonjëherë, ai i pëlqen njerëzve. Ndonjëherë zemëron tërë botën. Lufta ime është që ta mbaj atë fëmijë të gjallë. Por brenda meje dhe jo brenda fushës”, rrëfen braziliani.
