Rrëmuja e shkakruar në stërvitjen e Sporting Lisbonë në sezonin e kaluar, kur një grup tifozësh dhunuan lojtarët e këtij klubi, duket se do të vazhdojë me transferimin e Gelson Martins te Atletico Madrid, që tanimë po shqyrtohet nga FIFA.
Ashtu si bëri Rui Patricio, portieri që kaloi gratis te Wolves, edhe Martins e prishi automatikisht kontratën me Sporting pas dhunës së tifozëve. Për të dyja raste Sporting është ankuar te FIFA, e cila pritet të marrë një vendim në lidhje me këtë çështje.
Faktikisht, Atletico Madrid i propozoi Sportingut 15 milionë euro për këtë futbollist dhe opsionin për të marrë 50% të shumës nga shitja e tij e ardhshme, por Sporting refuzoi sepse kërkonte të paktën 20 milionë euro, gjysmën e klauzolës së lojtarit.
Palët nuk ranë dakord dhe në momentin që Martins e prishi zyrtarisht kontratën me klubin portugez, Atletico e mori gratis. Gjithsesi, Sporting është ankuar te FIFA dhe ka nisur një gjyq ndaj futbollistit dhe klubit spanjoll.