Mesfushori brazilian Paulinho është rikthyer te Guangzhou Evergrande pas vetëm një sezoni te Barcelona. Rikthimi i 29-vjeçarit në Kinë është konfirmuar ditën e diel.
Paulinho është blerë për 40 mln euro verën e kaluar dhe shënoi nëntë gola duke ndihmuar ekipin të fitojë titullin e La Liga-s.
Sipas raporteve në Spanjë, Paulinho thuajse ka dyfishuar rrogën e tij nga 8 në 15 mln euro. Ai do t’i bashkohet klubit kinez në formë huazimi, me blerjen përfundimtare që pritet të ndodhë vitin tjetër.
“Niveli i Super League kineze është përmirësuar nga viti në vit dhe zhvillimi ka qenë shumë i mirë,” shprehet Paulinho.
“I jam bashkuar Guangzhou me synimin që ta ndihmoj ekipin të fitojë sa më shumë trofe dhe të lumturoj tifozët.”
