Mund të kishte shkuar edhe më mirë, megjithatë shorti i fazës me grupe të Champions League në Montekarlo nuk e mërzit së tepërmi Juventus, që konsiderohet si favorit në këtë veprimtari.
“Zonja e Vjetër” do të ndeshet me Manchester United, Valencia dhe Young Boys.
“Eshtë një grup i fortë, një grup me vlera, me ekipe cilësore dhe me traditë. Do të shkojmë në stadiume historike si “Old Trafford” dhe “Mestalla”. Kjo është e bukura e Champions League. Objektivi ynë minimal në këtë veprimtari është të kalojmë fazën me grupe,” – tha trajneri i Juventus, Massimilano Allegri.
Ndërsa drejtori sportiv Giuseppe Marotta, shtoi: “Gjithçka varet nga ne, si gjithmonë. Mendoj se me afrimin e Cristiano Ronaldo është e drejtë të pretendojmë të fitojmë Champions League. Personalisht mendoj se ai e meritonte më shumë se Modric çmimin e futbollistit më të mira nga UEFA.”
