Barcelona nuk ka ndërmend të ndalet. Pasi siguroi shërbimet e Arturo Vidal, tashmë ka nisur sulmi për kampionin e botës, Paul Pogba. Klubi Blaugrana është serioz në këtë pikë dhe, sipas “Sky Sports”, tashmë e ka bërë ofertën e vet për Manchester United: 50 milionë euro, plus kartonët e Yerry Mina dhe André Gomes.
“Djajtë e Kuq”, megjithatë, u përgjigjën pa hezitim, jo. Ata nuk do ta privojnë veten nga imazhi i një lojtari si Pogba dhe për më tepër nuk do të kishin kohë materiale për ta zëvendësuar atë.
Në Premier League, merkatoja e kësaj vere do të mbyllet pas dy ditësh, më 9 gusht, çka do të thotë se është e pamundur për Manchester Unitedin që të gjejë një zëvendësues për Pogba në 48 orë.
Barcelona do të përpiqet deri në fund, me Juventusin, që është gati për të bërë lëvizjen e tij, por aktualisht ky operacion duket mjaft i komplikuar.
