Natyrish që nuk ka qenë një kthim i lumtur për Bonuçin te Juventusi. Qendërmbrojtësi italian u kthye pas një viti në Torino, por tifozët bardhezi nuk i kanë rezervuar një pritje miqësore. Të luash për Milanin është një tradhëti e pafalshme dhe me një fakt të tillë ai është përballur në qendrën stërvitore të kampionëve të Italisë.
Njëri prej tifozëve e ka pyetur direkt:” Kur do të kërkosh falje për tradhëtinë që bëre vitin e kaluar?” 31-vjeçari është përgjigjur pa u menduar gjatë:” Nuk kam pse të përgjigjem me fjalë!”.
Ai i është bashkuar pjesës tjetër të ekipit në stërvitje ku ka rigjetur shokët e tij të dikurshëm. Bonuçi kaloi te Milani vitin e kaluar për shkak të mosmarrëveshjeve me trajnerin Allegri. Por sezoni katastrofik i kuqezinjve dhe sulmet nga tifozët për performancën e dobët e bënë Bonuccin të pendohej dhe të kthehej aty ku bëri emër si njëri prej mbrojtësve më të mirë në botë.
