Shkëndija humbi me rezultatin 3-0 në takimin e parë të raundit të tretë kualifikues të Ligës së Kampioneve kundër Red Bull Salzburg. Për shqiptarët nga Tetova do të jetë shumë e vështirë që të mund të kualifikohen për në play off-in e këtij kompeticioni. Mrekullia duhet që të ndodhë në sfidën e kthimit në Maqedoni.
Në pjesën e parë, vendasit u treguan më të saktë me gjithë këmbënguljen e ekipit tetovar. Salzburg gjeti golin pas 16 minutash lojë me anë të Munas Dabbut, i cili realizoi nga pika e bardhë e 11 metërshit.
Ekipi shqiptaro-maqedonas u përpoq të reagonte, por u tregua i pasaktë. Shkëndija goditjen e dytë e mori në kohën shtesë kur Zlatko Junuzovic ktheu në gol një goditje dënimi.
Në pjesën e dytë, tetovarët u përpoqën që të ngushtonin rezultatin, por mbrojtja vendase u tregua e saktë dhe nuk la hapësira. Sfida ishte mjaft e luftuar, ndërkohë që goditja finale për Shkëndijën erdhi në minutën e 81’, kur Diadie Samassekou realizoi golin e tretë për austriakët nga pika e bardhë e 11 metërshit.
Dalja nga loja e autorit të golit të dytë Junuzovic (kartoni i dytë i verdhë në të 83’), nuk ndryshoi asgjë për shqiptaro-maqedonasit, që tani do ta kenë të vështirë që të bëjnë mrekullinë në sfidën kthimit.