Barcelona tregoi se ata janë “më shumë se një klub” pas një ndeshje të ekipit U-13, ku fëmijët e skuadrës katalanas treguan një solidaritet të rrallë pas ndeshjes së vlefshme për “Junior Soccer World Challenge”.
Ky brez i talentuar lojtarët fitoi 3-1 në finalen kundër Arsenal, në turneun e zhvilluar në Japoni, por gjesti i tyre në çerekfinalen e fituar me penallti ndaj FC Persimmon, bëri për vete të gjithë ata që ishin në Osaka.
Barcelona U-13 fitoi 11-10 me penallti, pasi koha e rregullt u mbyll 2-2. Pas ndeshjes, të gjithë fëmijët me fanellën e Barcelonës, përpara se të festonin suksesin, shkuan të përqafonin fëmijët kundërshtarë, që kishin përfunduar në tokë nga dëshpërimi.
Me fjalë të ngrohta, puthje dhe përqafime, veprimi i 12-vjeçarëve “blaugrana” ishte një gjest unik që tregon më së miri moton, “Mas que un club” – “Më shumë se një klub”.
