Sulmuesi brazilian Gabriel Jesus i ka kërkuar trajnerit Pep Guardiola që ta praktikojë më shpesh skemën me dy sulmues, ku ai dhe Sergio Aguero luajnë së bashku në fushë, siç dhe ndodhi në ndeshjen që skuadra e Manchester City luajti dhe fitoi 6-1 ndaj Hudersfield në Premier League. Një dyshe që duket se këtë sezon do të shkëlqejë, ndaj dhe Jesus shpreson të aktivizohet sa më shumë. “Në këtë sfidë Pep vendosi që të luajmë së bashku Aguero e unë edhe pse ne kemi 6 lojtarë që janë të aftë të luajnë në sulm”, tha Gabriel Jesus.
“Zakonisht, kur dhe Sergio luajmë së bashku, zhvillojmë ndeshje të mira dhe arrijmë të fitojmë. Unë besoj se duhet të luajmë më shpesh, pasi të dy e kemi në gjak realizimin e golave, siç dhe ndodhi. E kemi nisur në mënyrën më të mirë të mundshme këtë sezon dhe shpresoj që të vazhdojmë me këtë ritëm. Me Sergio kuptohemi shumë mirë dhe Guardiola e di shumë këtë gjë, ndaj shpresoj që së bashku të luajmë sa më shumë”, u shpreh Jesus, që duket se do të jetë alternativa e dytë për sulmin e City, pasi Guardiola i beson më shumë përvojës së Aguero.
