Manchester United ka fituar duelin me fqinjët e Manchester City për të marrë mbrojtësin 16-vjeçar polak Lukas Bejger, që nga të gjithë konsiderohet si “Sergio Ramos i ardhshëm”. Dy ekipet e Manchester ishin në garë për të marrë mbrojtësin që ka ardhur nga Akademia e Lech Poznan, një investim që do të jetë për të ardhmen.
Bejger luan me kombëtaren polake të moshës së tij, ku ëhstë kapiten dhe pritet të jetë pjesë e kombëtares së të rriturve edhe në ndeshjen që Polonia do të luajë në shtator ndaj Skocisë. Një qendër-mbrojtës i fortë, por që mund të luajë edhe në krahun e djathtë dhe i aftë të realizojë me kokë, ndaj dhe krahasohet me Sergio Ramos.
Gjatë kohëve të fundit, përfaqësuesit e skuadrës së United kanë qenë në Poloni dhe kanë ndjekur nga afër lojtarin, duke nënshkruar një kontratë me të. Për Lukas Bejger ishte interesuar edhe skuadra e City, por duket se drejtuesit e United u treguan më të shpejtë dhe arritën të rrëmbejnë lojtarin.