Në konferencën e sotme për shtyp të Partizanit mesfushori Lorenc Trashi ka dalë në krah me teknikun Skënder Gega. 26-vjeçari deklaroi se të kuqtë do ta ndiejnë mungesën e tifozëve dhe fakti që është një skuadër pa bujë mund t’i japë shtysë drejt suksesit.
“Vijmë nga një humbje me Skënderbeun, që e kemi harruar. Duhet të mendojmë për Kamzën, e kemi studiuar. Ata kanë një ekip të mirë, i ndoqëm me Tiranën. Duhet të japim më të mirën tonë që të marrim tre pikët. Kanë kaluar problemet e vjetshme. Është futur një frymë tjetër në skuadër, janë ndarë disa gjëra, kush do jetë kapiteni, kush do të jetë zëvendëskapiteni.
I kemi zgjedhur vetë ne lojtarët dhe është diçka e mirë. Jam shprehur se ky ekip, ndryshe nga sezonet e kaluara, është më shumë pa bujë. Besoj ky do të jetë çelësi i suksesit. Të gjithë trajnerët kanë taktikat e tyre. Nuk mund të jap një mendim. Pozicioni? Unë luaj aty ku mendon trajneri, aty ku ka nevojë ekipi. Çdo ekip në fillim ka probleme, ndeshjet e para studiohen kundërshtarët. Ndeshjet në vazhdim do tregojnë forcën e ekipit”, përfundon deklaratën mesfushori i Partizanit.
