Sonte, në orën 18:00, në stadiumin “Niko Dovana” të Durrësit do të luhet trofeu “Pascucci” ndermjet tri skuadrave: Teutës, Partizanit dhe Lirisë së Prizrenit. Ndërkohë, të kuqtë e Skënder Gegës janë gati për këtë test gjeneral, para nisjes së kampionatit të ri. Ata kanë mbyllur dje minipërgatitoren në kompleksin sportiv “Pepa”, në Elbasan.
Përgjatë këtyre 2 javëve, lojtarët kanë marrë ngarkesa të larta, me nga dy seanca në ditë, si dhe kanë luajtur 2 takime miqësore, të cilat i kanë shërbyer stafit për të konsoliduar ekipin, i cili sot do të udhëtojë drejt qytetit të Durrësit .
Testi i fundit përpara fillimit të kampionatit do të jetë trofeu “Pascucci”, ku të besuarit e Gegës do të përballen me Teutën dhe Lirinë e Prizrenit, në stadiumin “Niko Dovana”, duke nisur nga ora 18:00.
