Një shishe verë dhe dy fanella të Real Madrid në një qese plastike mjaftuan për të bindur Mauricio Pochettino për karakterin e vërtetë të Jose Mourinho, shumë larg përshtypjes së një portreti mendjemadh që është krijuar kudo.
Pochettino, në hapat e parë të karrierës së tij te Espanyol, humbi kundër Real Madrid të drejtuar nga Mourinho, por portugezi lëvizte nëpër stadium duke kërkuar numrin e telefonit të argjentinasit.
Kur e gjeti “Special One” i dhuroi një shishe verë “Chateau Cos d’Estournel”, ndër më të mirat e prodhura në Bordo dhe dy fanella të autografuara të Real Madrid, për djemtë e Pochettino. Në këtë moment lindi një miqësi.
Sonte në “Old Trafford”, dy shokët trajnerët do të vihen përballë njëri-tjetrit.
Pochettino ka lexuar disa histori gjatë kësaj jave në lidhje me Mourinho, duke nisur nga zënka e tij me Pogba, debatet me Ed Woodward dhe polemika me Pep Guardiola. Megjithatë opinioni i tij nuk ka ndryshuar dhe Jose për mendimin e tij është njeriu i duhur për skuadrat e mëdha, ai që frymëzon të gjithë trajnerët e rinj në futboll.
“Për çdo trajner të ri, Mourinho është një frymëzim, – tha Pochettino. – Për të gjithë, pa asnjë dallim. Unë kam marrë shumë prej tij, shumë gjëra, ai është një trajner dhe menaxher i jashtëzakonshëm. Unë jam më i ri se ai, gjithmonë do të ketë polemika, gjithmonë do të ketë ulje-ngritje në karrierën e dikujt, por nuk e fsheh se shembulli im në shumë aspekte ka qenë Mourinho. Kam ndërtuar një miqësi dhe respekt për të që kur isha te Espanyol.”
Në letër duket si një miqësi e pazakontë. Pochettino pëlqen futbollin dëfryes dhe të shpejtë, ndërsa Mourinho është teorikisht kundërshtari kryesor i kësaj mënyre të së luajtur. Mourinho është shumë më i kujdesshëm dhe bazohet kryesisht te loja në bllok pa rreziqe.
“Kur humbet një trajner ndjen gjithmonë përgjegjësinë, – tha Pochettino. – Unë jam trajneri dhe marr përgjegjësinë kur gjërat nuk shkojnë mirë. Ka momente kur i them vetes se mund t’i bëja gjërat më mirë. Kurrë nuk duhet të kënaqesh. Edhe kur fitosh, duhet të kërkosh të përmirësohesh.”
Në 15 ndeshje përballë njëri-tjetrit, Mourinho ka fituar 11 herë kundër Pochettino, i cili ka triumfuar tre herë, ndërsa vetëm një ndeshje është mbyllur në barazim.