E ardhmja e Sergej Milinkovic-Savic duket larg Lazio dhe orët e fundit po merr formë transferimi i mesfushorit serb te skuadra e PSG-së. Mediat franceze kanë konfirmuar se menaxherët e 23-vjeçarit serb kanë qenë në Paris, ku janë takuar me drejtorin sportiv të skuadrës pariziene Antero Henrique. Ende nuk ka asnjë detaj në lidhje me këtë transferim të mundshëm të mesfushorit te kampionët e Francës dhe nëse PSG do të paguajë shumën100 milionë euro, shumë që ka kërkuar presidenti i Lazio, Claudio Lotito.
Në rast se skuadra franceze do të vendosë të paguajë këtë shumë, atëherë duhet ta realizojë këtë transferim brenda datës 31 gusht, kur dhe mbyllet merkato në kampionatin francez. Paratë duket se nuk janë problem për PSG-në, që orët e fundit largoi Gonçalo Guedes për 40 milionë euro te Valencia. Mesfushori Sergej Milinkovic-Savic ka qenë një nga emrat më të lakuar të merkatos së verës, teksa ekipet më të mëdha në Europë kanë kërkuar ta blejnë, por kërkesa e lartë që ka kluzi lazial ka penguar transferimin.
