Roma e ka mposhtur Barcelonën 4-2 në një ndeshje të turneut përgatitor parasezonal, International Champions Cup, të mërkurën në Arlingon të SHBA-së.
Romakët iu hakmorën në njëfarë mënyre Barcelonës, duke e mposhtur 4-2 në “AT&T Stadium” në Arlington, për mënyrën sesi ia rrëmbeu nga dora talentin Malcom, i cili iu bashkua katalonasve edhe pse kishte marrëveshje me Romën dhe pritej të zbarkonte në kryeqytetin italian, transmeton Express.
Në fakt, ishte skuadra e Ernesto Valverdes që e nisi furishëm takimi duke gjetur rrjetën e portës së Romës qysh në minutën e pestë, kur Rafinha shënoi pas një kombinimi me El Haddadin.
Reagimi i romakëve të Eusebio Di Francescos erdhi pas gjysmë ore, kur El Shaarawy realizoi gol falë asistit të Justin Kluivertit.
Në fillim të pjesës së dytë, Valverde i bëri gjashtë zëvendësime, duke futur në lojë lojtarë të rinj, para se Malcom të shënonte për ta kthyer epërsinë e Barçës në minutën e 49-të, dhe golin e tij të parë në fanellën e klubit katalonas.
Di Francesco i bëri plot nëntë zëvendësime, të cilat patën ndikimin e vet, pasi Roma shënoi tri herë brenda dhjetë minutave për ta përmbysur Barcelonën.
Së pari Florenzi e pastaj Cristante dhe Perroti realizuan për skuadrën nga kryeqyteti i Italisë për fitoren 4-2.
Kështu duket tabela e International Champions Cup pas kësaj xhiroje.