Miqësorja e fundit përpara nisjes së kampionatit nxori në duke problemet e para të Tiranës. Humbja 3-1 përballë Prishtinës ishte një makth me kuptimin e plot të fjalës. Kjo u pranua edhe nga trajneri Ze Maria, që thekson se gabimet e ndodhura në këtë test do të jenë të ndaluara në kampionat.
Ishte një makth për ne. Ata e nisën ndeshjen shumë fort dhe shumë shpejt. Hasëm disa vështirësi për të gjetur balancat. Paguam një çmim të lartë mbi të gjitha në pjesën e parë të ndeshjes. Është normale të ndodhë në këtë periudhë përgatitjesh, por pas dy javësh do të jetë e ndaluar. Kam dy javë të punoj dhe të organizoj gjithçka.
Trajneri brazilian e shfrytëzoi ndeshjen për të testuar disa mënyra loje. Nga rreshtimi 4-2-3-1 dhe moduli ofensiv 4-3-3, për tu rikthyer edhe te sistemi tradicional 4-4-2. Trajneri provoi të fshihte se çfarë Tirane do të shihet në fushë në debutimin e kampionatit, më 19 gusht ndaj Kamzës, edhe pse mënyra e lojës duket e përcaktuar.
Është sekret, do ta shihni në ndeshjen e parë. Kam lojtarë të cilët ma lehtësojnë të ndryshoj sistemin gjatë ndeshjeve. Por, në mënyrë specifike kemi dy module loje, që do t’i praktikojmë dhe lojtarët i njohin. Në miqësore ndryshova, sidomos prej karakteristikave të lojtarëve që kisha në fushë.
Përpara fillimit të kampionatit, Ze Maria pret edhe dhuratë e fundit nga klubi. Bardheblutë kanë nevojë për një sulmues dhe një portier, ndërsa trajneri shpreson se Ilion Lika do të jetë gati për javën e parë të kampionatit.
Kam 25 futbollistë. Sigurisht që na nevojitet një portier tjetër dhe një sulmues. Do të flas me presidentin këto ditë. Nëse do të vinte një lojtar i ri do të ishte mirë. Prej sezonit të kaluar kërkova një numër 9, sepse Ngo u dëmtuam katër muaj më parë dhe nuk kthehet të paktën deri në tetor. Ka nisur stërvitje të diferencuar dhe do t’i nevojitet kohë. Për këtë arsye, afrimi i një qendër sulmuesi do të ishte shumë i rëndësishëm për mua. Por, nga kjo nuk varet jeta ime. Nëse sulmuesi i ri nuk do të vijë, do të luaj me lojtarët që kam. Rikthimi i Ilion Likës? Shpresoj të jetë gati për ndeshjen e parë dhe besoj se do t’i bashkohet ekipit. Ka nisur trajtimet për shqetësimet në shpinë dhe kur të kthehet në stërvitje do të jetë gati.
