Bashkëjetesa mes Ferrari-t dhe Kimi Raikkonen do të mbyllet këtë fund sezoni. Ka qenë vetë shtëpia e Maranello-s që e ka zyrtarizuar me anë të një deklarate për shtyp. “Skuderia Ferrari komunikon se, në fund të sezonit 2018, Kimi Raikkonen do të largohet nga roli i tij aktual.
Gjatë këtyre viteve, Kimi i ka dhënë skuadrës një kontribut thelbësor, si në cilësinë e pilotit ashtu edhe për cilësitë njerëzore. Roli i tij ka qenë vendimtar për rritjen e skuadrës dhe, në të njëjtën kohë, ka qenë përherë një njeri i madh në skuadër”. Lexohet në sajtin e Ferrari-t.
Piloti finlandez Kimi Raikkonen më tej ka njoftuar nëpërmjet profilit të tij zyrtar në Instagram se ka firmosur kontratën e re dy-vjeçare me Sauber Alfa-Romeo: “Jam i lumtur që do të kthehem aty ku nisi gjithçka”. Në vendin e lënë bosh prej tij, pra në krah të Sebastian Vettel do të jetë Charles Leclerc.
