Fillimi i kampionatit nuk ka qenë aspak i mirë për ekipin e Interit, që me 4 pikë është shumë larg skuadrave më të mira në Serinë A. Një fitore, një barazim e dy humbje janë një bilanc jo i mirë për skuadrën zikaltër dhe këmbanat e para të alarmit për trajnerin Luciano Spalletti kanë nisur të bien. Inter do të luajë në Champions ndaj Tottenham, me shpresën që të rikthejë buzëqeshjen, por emrat e parë që qarkullojnë për të zëvendësues Spallettin kanë dalë.
Walter Zenga, portieri legjendar i skuadrës zikaltër, një nga ikonat e këtij ekipi, duke folur për shanset që ka për të drejtuar Interin, tha: “Unë në stolin e Interit. Ju lutem, mos më vini në vështirësi me Spallettin, sepse është miku im. Ndoshta do të jem trajner i Interit në “play station”, pasi nuk kam asnjë shans të ulem në atë stol”, tha Zenga.
“Fillimi i kampionatit nuk është i mirë, por gjërat mund të ndryshojnë shpejt, pasi çdo ekip ka nevojë për t’u ambientuar pas ndryshimeve dhe Interi ka ndryshuar. Duhet më shumë grintë në fushë dhe shpresoj që kjo gjë të duket në ndeshjet e radhës”, u shpreh Walter Zenga.