Rikthimi i kampionatit italian pas pushimit 2-javor (luanin kombëtaret) nuk ka qenë aspak i mirë për skuadrën e Interit, që pësoi një zhgënjim total në “San Siro”, ku u mund 1-0 nga Parma. Një rezultat surprizë, që ka befasuar si tifozët, ashtu dhe lojtarët e vetë trajnerin Luciano Spalletti, që pas 4 javësh ka vetëm 4 pikë në renditje. (1 fitore, 1 barazim dhe 2 humbje). Natyrisht që nuk ka qenë ky rezultati që tifozët prisnin në këtë fillim-kampionat.
“Nuk e prisja që pas 4 javësh të kishim pësuar dy humbje, një prej tyre edhe para tifozëve tanë. Është e vështirë të shpjegosh këtë moment, të shfajësohesh. Të gjithë duhet të japim më shumë edhe unë kam përgjegjësitë e mia për këtë moment”, tha Spalletti pas humbjes ndaj Parmës.
“Të gjithë kemi faj për këtë situatë, duhet të japim më shumë në fushë edhe pse ndaj Parmës, në shumicën e kohës luajtëm mirë. Por me sa duket kjo nuk mjafton. Ndonjëherë duket sikur krijojmë më shumë konfuzion në fushë dhe në pjesën e dytë shpesh ishim të paqartë në veprimet sulmuese”, shtoi më tej Spalletti. Trajneri u shpreh se Interit iu mohua edhe një penallti, që sipas tij mund të kishte ndryshuar fatin e lojës.
