Ylli belg i Chelseas, Eden Hazard beson se strategjia taktike e trajnerit të ri të Bluve, Maurizio Sarri i shkon atij më për shtat se ajo e dy trajnerëve të mëparshëm të ekipit të “Stamford Brdige”. Futbollisti i përfaqësueses belge që ka realizuar më shumë driblime se çdo futbollist tjetër në këtë sezon, 14, ka pranuar se preferon të luajë në sistemin dhe stilin e Sarrit, më shumë se në atë t ëish-teknikëve, Conte e Mourinho. Hazard ka qenë në qendër të suksesit të Chelseas në dy titujt e fundit të fituar në Premier League, nën drejtimin e Antonio Conte dhe Jose Mourinho, sikurse dhe në ngritjen e trofeve të FA Cup dhe Europa League.
“Mua më pëlqen të kem topin, jo në gjysmëfushën time, por në ato 30 metrat e fundit. Më pëlqen ky tip loje, është krejtësisht ndryshe nga ai i Conte dhe Mourinho. Sikurse them, ne kemi më shumë zotërim të topit, kështu që për mua nuk është keq”, deklaroi Hazard, i cili paralajmëroi gjithashtu rivalët e Chelseas për titullin kampion në Premier League: “Sigurisht në fund duam të konkurojmë për tre vendet e para. Ne duam të jemi kampionët në fund, ndonëse e dimë se do të jetë e vështirë për shkak se Manchester City, Liverpool dhe Tottenham janë shumë të fortë. Ndaj do të shohim në fund, por duam të jemi në krye. Mund të përmirësohemi, kemi vetëbesimi”.