Pas plot 11 ndeshjeve pa gol, përfshirë atyre në Kupën e Botës që Franca e fitoi këtë verë, Olivier Giroud është zgjuar nga gjumi për të shënuar gol që doli të ishte i fitores së rëndësishme për “Gjelat” ndaj Holandës në Ligën e Kombeve të dielën në Paris.
Franca po vinte nga një barazim pa gola ndaj Gjermanisë në ndeshjen hapëse të Grupit 1 në Ligën A të turneut të UEFA-s Liga e Kombeve tri ditë më parë në udhëtim, dhe ia arriti ta shijojë fitoren e vështirë 2-1 ndaj “Tulipanëve” në “Stade de France” në Paris, raporton Gazeta Express.
Kampionia e botës e nisi furishëm takimin para spektatorëve të vet që i bënë një pritje madhështore, të parën në shtëpi që prej triumfit në Botërorit Rusia 2018, pasi kaloi në epërsi falë Kylain Mbappes që bëri gol pas një çereku lojë.
Franca e dominoi skuadrën vizitore gjatë gjithë pjesës së parë, por në pushim mes pjesëve shkoi me vetëm një gol epërsi.
Një Holandë më të mirë dhe më këmbëngulëse pamë në pjesën e dytë. Holandezët ia dolën ta barazonin rezultatin në minutën e 67-të, kur Memphis Depay e gjeti të vetëm para portës, Rayan Babelin, i cili shënoi nga afërsia.
Për habinë e shumë personave, që mbase nuk do ta prisnin një njëri që e fitoi Kupën e Botës pa shënuar asnjë gol edhe pse luajti në sulm, Oliveri Giroud shënoi golin e shumë pritur në stilin e tij, pas një super pasimi nga Benjamin Mendy.
Goli i shumëpritur i Giroud nënkuptoi tri pikë për Francën, që tani ka 4 në total dhe është lider në Grupin 1 të Ligës A.
Gjermania zë vendin e dytë me 1 pikë dhe Holanda në fund me 0 pikë. Megjithatë, këtu dy skuadra kanë nga një lojë më pak të zhvilluar se Franca.
