Džemal Mustedanagić është i qartë për strategjinë që po ndjek si trajner i ekipeve Kombëtare në dy vitet e ardhshme. Ditën e djeshme nga salla e konferencave trajneri shpalosi objektivat e U-17 për eliminatoret e radhës që do të zhvillohen në datat 23-29 tetor, ku kuqezinjtë tanë do të përballet ndaj Azerbajxhanit, Norvegjisë dhe Çekisë. Një grup ky që Shqipëria mund të bëj konkurrencë të madhe, ndërsa të gjitha ndeshjet e këtij grupi do të zhvillohen në vendin tonë. Trajneri boshnjak gjithashtu bëri publike listën me lojtarët e grumbulluar. Në këtë listë të përbërë nga lojtarë që aktivizohen në kampionatin vendas dhe jashtë, bie në sy një lojtar nga akademia e Tottenham.
Bëhet fjalë për Albert Raqi-n. Djaloshi 15 vjeçar, është me prejardhje nga Prishtina dhe aktualisht jeton në Londër. Ai ka lindur në Kanada, ku është aktivizuar me ekipet e moshave dhe më pas ka lëvizur me familjen në Angli. Pikërisht këtu gjatë një ndeshje moshash ka tërhequr vëmendjen e vëzhgueseve të Tottenham, të cilët e kanë pëlqyer dhe e kanë ftuar te moshat e këtij ekipi.
Përveç fanellës së Tottenham, ai ka veshur edhe atë Kosovës. Disa kohë më parë ka qenë pjesë e përfaqësueses U-15, skuadër e cila ishte e grumbulluar në Frankfurt. Një goditje me vlera për kombëtaren U-17, me lojtarin që do të kërkoj të lërë gjurmë gjatë ndeshjeve të nëntorit me fanellën e kuqezinjve.
