Më në fund Etrit Berisha mund të marrë frymë lirisht te Atalanta. Tekniku i tij Gian Piero Gasperini deklaroi përpara ndeshjes së ardhshme në Seria A me Parmën hodhi në tavolinë idenë për të rikthyer në formacionin bazë portierin e Kombëtares sonë.
Ish-tekniku i Interit ka ndjekur metodën e vënies në provë të të dy portierëve të skuadrës së tij, një ide krejt e pazakontë, duke ditur që çdo ekip e ka një portier titullar të padiskutueshëm.
“Me shumë mundësi do e ndryshojmë portierin ndaj Parmës. Tani është rradha e Berishës, sepse Gollini i ka bërë shumë ndeshje për Atalantën në këtë sezon”, deklaroi tekniku italian.
Berisha nuk ka zhvilluar asnjë ndeshje si titullar me Atalantën këtë sezon, por tashmë ai i merr sërish dorezat për të dëshmuar se mbetet një portier i zoti.