Vendimi i fundit i Komitetit Olimpik të Italisë për të promovuar Milanon dhe Kortinën si dy qytetet që do të përfaqësojnë shtetin italian në garën për të fituar organizimin e Lojërave Olimpike të vitit 2026 ka revoltuar qytetin e Torinos.
Kryebashkiakja Chiara Appendino e sheh si fyerje të rëndë përpjekjen e Komitetit Olimpik të Italisë për të lënë jashtë njërin prej metropoleve më të zhvilluar jashtë fushatës lobuese për të fituar të drejtën e organizimit të Lojërave Olimpike.
“Është një kandidaturë e pakuptueshme, pasi do të ndërtohen impiante aty ku nuk ka asgjë. Torino ishte opsioni më pak i kushtueshëm dhe kush e merr këtë vendim duhet t’ia shpjegojë popullit. Komiteti të bëjë votim për opsionet dhe të vlerësohen meritat”, deklaroi Appendino.
Qeveria italiane deklaroi me anë të zv/kryeministrit Luigi Di Maio se organizimi i njërit prej turneve sportivë më të ndjekur në botë nuk do të investohet nga buxheti i shtetit, por nga vetë qytetet. Dhe një investim madhor kërkon qindra milionë euro.