Mërgim Mavraj dhe Migjen Basha kanë humbur “derbin” me Fiorin Durmishajn pasditen e kësaj të shtune, teksa Arisi është mundur në transfertë nga Panionios me rezultatin 1-0. Dy futbollistët e kombëtares, Mavraj dhe Basha, janë aktivizuar titullar me Arisin, por këtë mbrëmje kanë qenë të pafat përballë sulmuesit të kombëtares Shpresa, Fiorin Durmishaj, i cili gjithashtu luajti si titullar për Panionios.
Sakaq Basha u zëvendësua me nisjen e pjesës së dytë të lojës ndërsa Mërgim Mavraj e përfundoi takimin pa u zëvendësuar. Pavarësisht humbjes 1-0 në transfertë, lajmi i mirë është që dy futbollistët kuqezi po gjejnë hapësira dhe pritet të jenë në formë të mirë për kombëtaren.
Mesfushori tjetër i kombëtares, Ledian Memushaj, u aktivizua rregullisht me Pescaran në Serinë B në Itali. Vlonjati arriti të linte shenjën e tij në këtë takim, pasi në minutën e 37` ai dha asistin për golin e parë të Pescaras, i realizuar nga Mancuso.
Në fund skuadra e Memushaj fitoi takimin ndaj Beneventos me rezultatin 2-1, duke u ngjitur në vendin e parë të renditjes në Serinë B dhe hedhur një hap të rëndësishëm drejt Serisë A.
