Stavri Nica do të jetë trajneri i ri i Kastriotit. Pas dorëheqjes së Elvis Plorit, klubi krutan ka vendosur që në krye të pankinës të jetë një emër i njohur në futbollin shqiptar. 64-vjeçari do të prezantohet nesër para medieve në orën 14:00 dhe më pas do të nisë menjëherë nga puna.
Pasi është njohur me objektivat e klubit, ku primar është qëndrimi në elitë, Nica është dakortësuar me drejtuesit krutanë për të vijuar punën e lënë në mes nga trajneri shkodran Elvis Plori.
Stavri Nica është një emër i njohur në fushën e trajningut në futbollin shqiptar. Ai ka drejtuar disa skuadra në elitë, por edhe në kategoritë inferiore si Laçin, Teutën, Apoloninë, Burrelin etj. Tashmë duhet të përveshë “mëngët” për të nxjerrë nga kriza ekipin krutan që ndodhet në vendin e fundit të tabelës së klasifikimit me 4 pikë të grumbulluara.