Luajti vetëm 4 ndeshje për Manchester United, ku mbërriti me shumë bujë nga Seria A, por u largua duke lënë shumë pak gjurmë. Ky është portieri 49-vjeçar Massimo Taibi, që në vitin 1999 habiti të gjithë kur firmosi për “djajtë e kuq”, asokohe të trajnerit legjendar Sir Alex Ferguson. Prej 9 vitesh ai nuk luan më, por sot pranon se aventura e tij në “Old Trafford” mbetet një peng.
“Kur isha në Premier League me United, u detyrova të largohesha për shkak të problemeve që kisha me ish-gruan time. Kisha një kontratë 4-vjeçare me Manchester United, por nuk e respektova atë, pasi e lashë skuadrën. Po të kisha mundësi të zgjidhja sërish, sot do të qëndroja edhe i vetëm në Angli. Pas 6 muajsh isha i detyruar të ikja. Ishte një goditje e rëndë për mua”, tha Taibi.
