“Faleminderit të gjithë atyre, që më dërguan mesazhe inkurajimi. Duke shpresuar në shërimin tim të shpejtë, mendoj se nuk kam asgjë serioze. Jam shumë i lumtur dhe krenar që kam arritur numrin e 100 grumbullimeve me fanellën verdhegjelbër. Jam gjithmonë shumë krenar për ta përfaqësuar kombëtaren më të madhe në botë”.
Kështu, përmes Instagram-it, Neymar u mundua t’i qetësojë fansat e tij, të cilët përjetuan ankth kur e panë të dëmtuar gjatë miqësores së mbrëmshme me Kamerunin, që në minutën e 8-të. Sot lojtari do të bëjë të gjitha kontrollet e nevojshme mjekësore.
Një shqetësim të madh përjetuan edhe tifozët e PSG-së për yllin e skuadrës së tyre, sepse javën e ardhshme është sfida shumë e rëndësishme e Ligës së Kampionëve, ndoshta vendimtare për kualifikimin në grup, kundër Liverpool.