Sulmuesi i Atletico Madrid ka dhënë një intervistë për gjermanen Kicker dhe ndër të tjera ka lavdëruar futbollin e Bundesligës: “Bundesliga është shumë tërheqëse, ka shumë gola, siç e pamë në Dortmund pak ditë më parë.
Për Griezmann, pikërisht Dortmundi është ekipi për t’u ndjekur: “Sulm pa fund, ky është futbolli i vërtetë. Mendoj se Dortmundi pasqyron më së miri Bundesligën”.
Të martën Atletico do të mundohet të marrë hak ndaj Dortmundit, që e shpartalloi në Gjermani, ndërsa Griezmann tregon rrugën e fitores: “Do të mundohemi të shfrytëzojmë defektet e vogla në mbrojtjen e Dortmundit, por do të mbrohemi me shumë kujdes, para se të sulmojmë”.
Një transferim në Bundesligë duket ende i pamundur për kampionin e botës, edhe pse është folur shpesh për interesim nga Bayern: “Kam kontratë me Atletico-n deri në 2023, por asnjëherë nuk i dihet”.
Griezmann komenton krizën e Bayern-it: “Nuk e ka nisur mirë, ka shumë dëmtime dhe kjo ia ndërlikon punën. Megjithatë, gjermanët e kapin gjithnjë çerekfinalen, më pas shihet nëse kanë forcë për më tej”.
Po në Champions? “Për mua, Manchester City është favoriti i madh, sepse ka Pep Guardiolën si trajner. Më pas, Juventus e Barcelona, sepse kanë Ronaldon dhe Mesin. Diku më pas jemi edhe ne”.