Sezoni i keq i Bayern Munich deri tani i ka detyruar drejtuesit e klubit bavarez të mendojnë për të ardhmen e ekipit. Dhe në projektin e tyre nuk mund të ketë vend për James Rodriguez, sipas “Kicker”.
Kolumbiani mbërriti në “Allianz Arena” në formë huazimi nga Real Madridi, me opsionin e blerjes nga bavarezët për 42 milionë euro. Megjithatë, ai nuk i ka përmbushur pritshmëritë dhe klubi kampion gjerman nuk do të jetë aq i interesuar për të bërë një shpenzim kaq të madh.
Për pasojë, Uli Hoenessdhe Rummenigge po fokusohen te lojtarë të tjerë. Duke pasur parasysh se talenti i ri MLS, Alphonso Davies (18 vjeç), është kontraktuar tashmë, buxheti prej 200 milionë eurosh i merkatos bavareze mund të shkojë për përforcime lojtarësh, si Kevin Vogt, Ante Rebiç dhe Luka Joviç.
Misioni është i qartë: rinovimi i grupit aktual të Bayern Munich, në të cilin duket se diçka është “ndryshkur”. James Rodriguez është kundërshtar i hapur i trajnerit Niko Kovac, ndaj pritet të mos jetë prioritet. Thënë ndryshe, kthimin i kolumbianit te Real Madridi tani është mëse i mundshëm.
