Nëse ende nuk e keni marrë vesh, futbolli në Kolumbi është çështje serioze, për jetë a vdekje. Po, në kuptimin e vërtetë të fjalës, kujtoni të shkretin Eskobar në 1994, kur mbrojtësi fatkeq shënoi autogol në ndeshjet kundër Shteteve të Bashkuara të Amerikës dhe Kolumbia u eliminua. Pak ditë më vonë Eskobar mbeti i vrarë në Kolumbi, e hoqën qafe kartelet e drogës, nga nervat e kualifikimit dhe nga paratë e basteve të humbura për fitoren e Kolumbisë.
Edhe ditën e sotme ka ndodhur diçka e ngjashme në Kolumbi, në Kali, sepse një futbollist ka rrezikuar jetën pikërisht pak orë pas eliminimit të ekipit të tij.
Deportivo Kali, klub i madh në Kolumbi, fitoi dje 1-0 në ndeshjen e fundit të kampionatit, por nuk arriti të renditej mes 8 ekipeve të kreut, që kalojnë në play-off për titull.
Duket se zemërimi për eliminimin nuk përballohet lehtë në Kolumbi, sepse sot futbollisti Juan Sebastian Quintero ka rënë pre e një atentati.
Makina e tij u qëllua nga 6 plumba, por për fat të mirë futbollisti ia hodhi paq, duke mos u goditur nga plumbat. Deportivo Kali ka dënuar ngjarjen dhe ka kërkuar ndihmën e policisë për të shmangur ngjarje të tilla të dhunshme, që tregojnë edhe një herë anën e frikshme të futbollit kolumbian.
