Disa ditë më parë bëri bujë një lajm që lidhej me rikthimin e Arsen Venger në krye të një ekipi, që ishte Milani. Një lajm i dhënë nga “France Football” dhe që bëri jehonë të madhe kudo. Lidhur me ëtë çështje ka folur pikërisht Arsen Venger, i cili ka thënë fjalën e tij për lajmet e pak ditëve më parë.
Ish-tekniku i Arsenalit, duket se ka përgënjeshtruar gjithçka duke thënë se lajmet e dhëna janë false. Në deklaratën e tij për “Bein Sport”, 69-vjeçari ka hedhur poshtë çdo spekulim që e lidh këtë të fundit me zëvendësimin e mundshëm të Xhenaro Gautzos, në pankinën e Milanit.
“E vetmja gjë që mund të them është që janë të gjitha lajme false. Në qoftë se do të nënshkruaj me ndonjë ekip do e them vetë, por kjo që është thënë këto ditë nuk është e vërtetë. Nuk mund të përgjigjem për çdo thashetheme, unë flas për atë që bëj. Tani jam i fokusuar në atë që po bëj”, përfundoi fjalët e tij francezi Venger.
