Ish-mesfushori i Manchester Unitedit, Ryan Giggs, beson se edhe nëse trajneri portugez, Jose Mourinho, shkarkohet nga pozita e tij në klub, situata në klub nuk do të ndryshojë.
Mourinho i kishte sfiduar lojtarët e tij të përfundojnë në top katërshe në Premierligës në fund të dhjetorit, megjithatë kjo duket e pamundur pas barazimit kundër Crystal Palace në shtëpi.
Ish-kapiteni i Manchester Unitedit beson se klubit duhet ta fitojë çdo ndeshje të këtij sezoni për ta arritur një vend në top katërshe, mirëpo ka kërkuar nga drejtuesit e klubit ta mbajnë Mourinhos në mënyrë që të ofrojnë më shumë stabilitet në klub.
“Nuk e shoh se si ndryshimi i trajnerit në këtë fazë të sezonit mund të ndryshojë diçka. Të gjithë e dinë se ai ka qenë një trajner i suksesshëm gjatë viteve të fundit. Unë besoj se ai duhet të qëndrojë në pozitën e trajnerit për ta ofruar një stabilitet që nuk e kemi pasur më herët”, ka thënë Giggs.
“Por, rezultatet duhet të ndryshojnë. Mendoj se e kemi trajnerin dhe lojtarët e duhur për ta bërë këtë gjë. Me çdo ndeshje të cilën nuk e fitojnë, detyra për t’u futur në top katërshe bëhet edhe më e vështirë”.
